حصان بري

صوره وسؤال

ده مصور ياباني كان بيصور مظاهرات في ميانمار
في سبتمبر الماضي
المهم هنا مش انه ياباني
ولا مظاهرات المعارضه في ميانمار- اللي معرفش دي فين اصلا

الاهميه هنا ان الراجل ده اخد كام رصاصه
وهو بيموت
تعرف اخر حاجه عملها ايه؟
رفع الكاميرا واخد صوره
صوره اخيره

لناس بتهرب
وعصايه كهربا

الراجل ده كان عنده هدف فكر فيه لاخر لحظه في حياته
ياتري انت عندك ؟
.....................................................................
الصوره دي مش محتاجه تعليق
بزمتكم
الناس دي بتتخانق علي ايه وحياتهم وبلدهم علي كف عفريت؟
وهل اسرئيل مفيهاش احزاب وتيارات فكريه متضاربه وبشده؟
ام هو غباء فطري في شعب قبلي بالفطره؟
غباء لا اجده بعيدا عن شعوبنا العربيه
كلها
.............................................................
اغتيال بناذير بوتو الخميس الماضي
الشعب ضد الجيش
مئات القتلي في 3 ايام
وثوره عارمه
وتصدي قاسي من جيش لا يعلم انه يقتل ابنائه واخوانه
باكستان تنهار
او تستيقظ
السوال هو:
هل سيتكرر السيناريو في بلد يحكمها قائد عام للقوات المسلحه؟
قائد لا عذر له
اذا كان يعلم ما يحدث ببلده فهي مصيبه
واذا كان لا يعلم فهي كارثه

نعم انها مصر
وانه مبارك
...............................................................................................
الراجل ده
صريح ماشي
وقح ماشي
انما غبي لا
طالع من السجن يشتم في الكل من تاني
طبعا مع شويه محلسه للريس

ياتري وحشك السجن؟
ولا المره دي عارف انت بتعمل ايه؟
..............................................................
وفي الاخر مش صوره
بس شعر
اذا كنت ذا رأي فكن ذا عزيمة ...... فإن فساد الرأي ان تترددا

يمكن البيت ده مش عبقري في حد ذاته
لكن من اكبر عيوبنا اننا دايما بنلعب في المضمون
دايما بنختار اسهل الاختيارات
ويا سلام بقي لو قدرنا نهرب من الاختيار خالص
حتي لو عارفين فين الاختيار الصح
بنهرب من التجارب الجديده
بنهرب من المخاطره
بنهرب من طعم الحياه

نصيحه:
اختار

Posted by حصان بري at 18:39 15 علقوا

اختيار

شعر بثقل علي كتفيه

Posted by حصان بري at 13:49 3 علقوا

سمك لبن تمر هندي- جزء 2

عندما تتساوي امامك كل الخيارات
كلها

Posted by حصان بري at 01:42 7 علقوا

فضفضه

عندك دماغ!
طيب اقعد
هات كرسي واقعد
عاوز افضفض

- حاسس بحاله اكتئاب بين المدونين
فقدوا اكبر ميزه في التدوين
انهم يكتبوا لنفسهم
نفسهم وبس
طبعا فيه ناس بتشيل التعليقات
هي محاوله بس اثبتت فشلها
متخيل شخص قاعد بيلف علي المدونات ومش عاوز يعلق عند ده علشان ده ماعلقش عنده
او عند دي علشان يبان مهم شويتين قدامها
ساعات حتي ناس منهم بتتخطي الخطوط الحمرا لمجرد انه يعمل جدل
دي ماتبقاش كتابه دي تبقي سلطه
ومش عاوز حد يقول ان ده مش الكل
لاني ماقلتش ان الكل كده
بس فيه كتير كده

- القاهره بقت زحمه قوي والناس بقت سلبيه قوي قوي

-حاجه تفرح طبعا ان صوره مصر عند العرب
هي سهره حلوه وبنات
الظاهر معدش عندنا دم فعلا

-الجواز محتاج مصاريف
والشباب مش قادر عليه
لانه مش لاقي شغل
او لاقي شغل مابيكفيهوش هو شخصيا
مع الارتفاع الجنوني للاسعار
هيصرف علي عيله ازاي؟

فالبنات مش لاقيه حد يتقدم
العنوسه في مصر واخده بناتنا للهاويه
وخصوصا اللي عدوا 27 و28 سنه
ربنا يستر

-اغضب
فان الارض تحني راسها للغاضبين
اغضب
فان الريح تذبح سنبلات القمح
تعصف كيفما شائت بغصن الياسمين

اغضب اذا لاحت امامك
امه مقهوره خرجت من التاريخ
باعت كل شيء
كل ارض
كل عرض
كل دين

اغضب
فانك ان تركت الارض عاريه
يضاجعها المقامر والمخنث والعميل
ستري زمان العهر يغتصب الصغار
ويفسد الاجيال جيلا بعد جيل
وتري النهايه امه مغلوبه مابين ليل البطش والقهر الطويل

الارض تكره كل قلب جاحد
وتحب عشاق الحياه
وكل عزم لا يلين
فالارض تركع تحت اقدام الشهيد
فاغضب
فان الارض يحييها الغضب
(من قصيده اغضب لفاروق جويده)
والقصيده كلها غالبا هنزلها في مدونه الكتب


- اكتشفت حاجه كنت فاكر اني حاربتها من زمان
بس واضح اني هفضل احارب فيها طول عمري
حاسس ان
ضعفي اللي ظاهر وقت جرحي مش انا
شري اللي ظاهر وقت غضبي مش انا
حتي ابتسامتي بقيت ساعات ارسمها بالمقاس
اتغيرت رغم كل محاولات الثبات
الحياه بتمشينا بمزاجها
كل يا تؤكل هي دي القاعده هنا

-عارف لما تحس انك بقيت تحط مصلحتك فوق اي اعتبار
ممكن تعديها لما يبقي فوق اي حد
لكن مايبقاش فوق حد صاحبك بجد
او بيحبك بجد

- ساعات بيبقي واجب فيها يتشل عقلك علشان تتنفس روحك
بس علشان مايجييش وقت تنمحي فيه روحك ويتصرف عقلك لوحده في حياتك
....................................

- كلها كام يوم واخلص الكليه
ست سنين وسبع شهور
وباضافه سنين الدراسه قبل الكليه يعني حوالي 18 سنه
18 سنه بدرس
:) كتير مش كده
ياتري هعيش كمان قدهم؟!
وهعيشهم زي مانا ولا هتغير؟
للاحسن او للاسوأ

-مش كل ايامك اللي فاتت بتبقي حلوه
بس حتي الايام الصعبه بتتحول لحلوه لما تبقي ذكريات
فاكر يا صاحبي؟!

-داخلين في حضن الحياه وشكلها كده هترسي علي سفر

-عصفورةَ قلبي، نيساني

يا رَمل البحرِ، ويا غاباتِ الزيتونِ

يا طعمَ الثلج، وطعمَ النار..

ونكهةَ شكي، ويقيني

أشعُرُ بالخوف من المجهولِ.. فآويني

أشعرُ بالخوفِ من الظلماء.. فضُمّيني

أشعرُ بالبردِ.. فغطّيني

إحكي لي قصصاً للأطفال

وظلّي قربي..

غنِّيني..

فأنا من بدءِ التكوينِ

أبحثُ عن وطنٍ لجبيني..

عن حُبِّ امرأة..

يكتُبني فوقَ الجدرانِ.. ويمحوني

عن حبِّ امرأةٍ.. يأخذني

لحدودِ الشمسِ..ويرميني

نوَّارةَ عُمري، مَروحتي

قنديلي، بوحَ بساتيني

مُدّي لي جسراً من رائحةِ الليمونِ..

وضعيني مشطاً عاجياً

في عُتمةِ شعركِ.. وانسيني

أنا نُقطةُ ماءٍ حائرةٌ

بقيت في دفترِ تشرينِ

زيديني عشقاً زيديني

يا أحلى نوباتِ جنوني

من أجلكِ أعتقتُ نسائي

وتركتُ التاريخَ ورائي

وشطبتُ شهادةَ ميلادي

Posted by حصان بري at 05:37 24 علقوا

من الارشيف

أتحبها؟
أحقا تريدها؟

لم أشعر أنك شخصين؟

شخص يعشقها من قمه رأسه الي أخمص قدميه
وشخص يخشاها كالموت ذاته
يخشي الحب وكأنه سيقتله

تراها فتسبقك قدماك اليها
تصل اليها ........ تقف..........تسلم بتعالي وكأنك رأيتها حالا
.........ثم تصطنع التشاغل

أتخشاها
أم تخشي الحب
أم تخشي نفسك؟
أم تخشي ضعفك؟
أم تخشي صراع قلبك وعقلك؟

ومن سمح لعقلك بالحديث؟
:فقط يصطنع المشاكل ويسألك:
أتحبها؟

وماتلك الحروف لتصف مشاعر تجتاح كيانك
لتصف دقه قلبك عندما يراها
دقه اخشي عليك يوما ان تكون اضعف من ان تحتملها
فيرفرف كالطير الذبيح ان قل لها

ترنو اليك بعينين في صفاء السماء
في لون بحر من بحور الجنه
بل محيط لا تدري اين شاطثه
فيصرخ كالمجنون: انها تحبك

وتسير كالمنوم اليهما
تمد يد ترجف للسلام
فتستميت علي يداها الا تتركيني

وتتصل القلوب
عبر بسمه خرجت عبر عينان في لون الحياه
عبر دقات الامل
عبر نظرات الخجل
عبر همسات لا تستقبلها الاذن
عبر لحظه تمر في غفله زمن
عبر قلب ضحك........ فخاف من لحظه شجن
عبر عين تود ان تغلق حين الفراق
فلا تنتبه الا حين ياتي ثانيه اللقا
:عبر عقل يطل علي استحياء, يسال
ماذا لو وقف العالم هنا؟
ماذا لو انتهي عند عيناها الدرب؟
:هو ذات عقل كان من قبل يسال
!!!!وكيف يبتسم القلب؟

تحديث:
يا جماعه اسف علي التقصير في المرور لاني بجد مطحون
دعواتكم

Posted by حصان بري at 23:51 13 علقوا

النجاح الاجتماعي

نري شخصا غايه في الذكاء من الناحيه الفنيه ويبذل جهد خرافي في عمله ولكن لا يكتب له النجاح
بينما نري شخصا اقل منه بكثير في الناحيه الفنيه ويبذل مجهود اقل ويجني اغلب النجاح

فنتسائل ما الفارق؟

اذا نحينا عامل الحظ او القدر جانبا
(وهو عامل مؤثر ولكنه ليس موضوعنا )
وجدنا ان الفارق بينهم يكون في طريقه العمل واتجاه بذل الجهد بحيث تكون الاستفاده به لاقصي حد
ومن بعد ذلك طريقه تقديم العمل بصوره ناجحه
ويمكن اختصار الجملتين السابقتين في مصطلح واحد
الذكاء الاجتماعي

الكلام مش علي مشروع تجاري
الكلام علي طريقه حياه

نبسطها برضه:)
انت لو عملت تورته عيد ميلاد تحفه وقدمتها علي لوح خشب قديم
حد هيفكر يدوقها اصلا؟
لو عملت مشروع جرافيك رهيب وقدمته علي شاشه ابيض واسود
حد هيفهمه؟
طريقه تقديم الفكره هي واجهه الفكره الي عقول الناس
هي الانطباع الاول
وكلنا عارفين طبعا ان الانطباعات الاولي تدووووووووووووووم
طريقه التقديم دي بقي هي جزء من الذكاء الاجتماعي

ومثلا لو عندك حجر علي الارض علي شكل كره
ووزنه 100 طن
وقافل لك طريق
طبعا لو واحد فكر يشيله من الطريق هيبذل مجهود كبير ومش هيقدر
انما لو دحرجه هيتحرك معاه
وباقل مجهود
وطريقه بذل المجهود دي كمان من اوجه الذكاء الاجتماعي

يعني ياجماعه مفيش حد بينجح في الحياه لمجرد ذكاء فني او مجهود اضافي فقط
لو مقدرش يوظف طاقاته كويس هيضيع مجهوده علي الفاضي
توظيف الطاقات دي هي الذكاء الاجتماعي
طبعا فيه ناس كتبت مجلدات في التنميه البشريه وتوظيف الطاقات
وعلشان كده هحاول يكون كلامي مختصر ومركز.

علشان تقدر توظف طاقاتك صح وبذكاء محتاج كام نقطه:

رقم 1: الثقه بالنفس والقدرات: ودي رقم واحد في اي نجاح
اهم نقطه فيها انها ماتكونش عشوائيه
يعني مش : انا جدع .... وخلاص
الثقه تنبع من التنظيم والاحتياط لاسؤا الاحتمالات
الثقه تنبع من تقدير قدراتك وقدرات الخصم و الظروف اللي ممكن تتدخل في النتيجه بشكل كامل
يعني الثقه قد تؤدي الي الانسحاب من معركه خاسره حتي تحين فرصه للنصر

وتذكر دائما ان: كلمه : اصل انا كنت فاكر ان .... دي اول علامات عشوائيه الثقه
وأول طريق الفشل

رقم 2: التخطيط:خلي دايما عقلك يسبق حياتك بخطوه
يعني تبقي عارف ناوي تعمل ايه؟
تبقي عارف ايه الخطوه الجايه
يعني تحط لنفسك خطه علي المدي القصير وخطه علي المدي البعيد
في اي مشروع او مرحله في حياتك
عاوز ابقي جواها ايه واطلع منها بايه؟
وده هيساعدك علشان توجه طاقتك صح وفي المكان اللي انت عاوزه
ومن غيره هتبقي بتلف في حلقه مفرغه

رقم 3:الابداع: يعني علي طول المشروع او الفكره -او الرحله حتي -
لازم اغلب الخطوات يكون فيها تجديد بشكل او باخر
المبدع هو فقط من يستحق ان يذكر
يعني مقدار افكارك الجديده والمفيده هو مقدار ظهورك ونجاحك

رقم 4: مهاره التقديم: ودي اصعب المراحل
لانها بتعتمد علي مهارتك الشخصيه في توصيل شيء معين للناس
وكله بيعتمد علي تقديرك الشخصي للموقف
يعني:
ساعات يتطلب انك ترسم حول مشروعك وحولك هاله من الغموض تعطيه وتعطيك حجم اكبر
وساعات يتطلب انك تنزل لمستوي اقل من حقيقتك علشان تقدر تخاطب اللي قدامك ويفهمك
ساعات يتطلب انك تقسو علي حد بتحبه علشان تعلمه
ساعات يتطلب الدفاع لفتره حتي تسنح لك فرصه للهجوم
ساعات حتي بيتطلب انك تظهر امكانيات اقل حتي يكون الهجوم مباغتا
ساعات يتطلب انك تكون اخرص في وقت انت محتاج فيه لسانك للدفاع
ساعات يتطلب انك تظهر لا مبالاه بينما يحترق داخلك
ساعات بيكون الاختيار الصحيح هو اصعب الاختيارات جميعا

والنقطه دي بالذات هي اساس كاريزما الشخص وتأثيره علي المحيطين
وهي باختصار مزيج من الذكاء والصبر وحسن التقدير
هي ان تعلم ماذا يقال؟ والاهم متي يقال؟

طبعا النقاط دول مش شكل نهائي ومحتاج افكاركم علشان الموضوع يكمل
يعني هنزل الكومنتات اللي تضيف في البوست

معلش متأخر بقي بس بصراحه التعليقات بجد مفيده
1 - حماده: التوكل علي الله رقم واحد لاي نجاح

2- لميا: شايفه انه برغم كل شيء فالحظ يلعب دور محوري ويمكن اهم دور

3- وايلد بيرد: شكرا

4- فوكيره : هنزل الكومنت زي ماهو:
امممم الذكاء الاجتماعى مصطلح مهم وشامل
تحته كل حاجه ممكن توصلك للنجاح
في مهارات كتير ممكن الواحد يحطها تحت بند الذكاء الاجتماعى ...
منها :
- التطبيق العملى ... يعنى ازاى يكون عندك مهاره تحويل الكلام النظري الي بنقرأه في الكتب ... لمهاره عمليه ممكن تستخدمها وتطور فيها كمان
- توظيف الاحداث والخبرات ... اقصد من كده انى ازاى اوظف الاحداث الي بتحصل في حياتى بحيث استفيد منها
سـواء اني احول الاحداث دي لشيء في صالحى واغير محور الاحداث
او اتعلم من حاجه فاتت
واعتقد ده بيجى بالتأمل ... يعنى اتأمل الاحداث .. اطلع منها السلبي والاجابي واحللها كويس واتعلم منها
- التواصل ... التواصل اعتقد انه بيزيد كـل ما تزيد قدره الانسان على الانصـات
ومتابعه الـ bodylanguage
للي قدامه ده بيخليه لمـاح ... و عنده شيء من الفراسه
وده بيوصله مع عوامل تانيه كتير ... انه يتعلم يقول ايه امتى
الى اتكلمت عنه يا دكتر
- الـمرح والود ... اعتقد الانسان المرح البشوش والودود بيكون اكثر نجاح
على كل المستويات
- الدعم ... سواء للنفس او للغير .. يعنى الانسان وقت الضغط يتعلم يدور على الجانب المشرق ويدى رسايل اجابيه لنفسه ... ده اولا .. ولغيره ثانيا
نموذج البنى ادم الى دايما يدور على النقط اللامعه في البشر الي قدامه ويلفت نظرهم ليها ويدعهم دايما ... نموذج ناجح اجتماعيا ودايما بيكون مركز او محور للناس الي حواليه
((ده ممكن يندرج تحت بند المجامله الصادقه ... يعنى انا محبتش اسميه مجامله لانه مهم يكون صادق وحقيقي))
- في مهاره التعامل مع كـل الثقافات .. بقدر الامكان
امممم... مفيش في دماغى حاجه تانيه دلوقتى

لكن ... كنت عايزه اتناقش معاك يا دكتر في نقطه الابداع .... هل الابداع ده تعلُم ام موهبه ....
او خلينا نحددها اكتر ... ازاى الانسان يزيد قدراته الابداعيه ..؟
في حاجه مؤمنه بيها وهى ان كـل الانسان ما زادت معلوماته ... كـل ما اتفتحت له ابواب للتفكير الابداعى
لكن هل ده لوحده كفايه ..؟؟
اسفـه جداا على التطويل لكن الموضوع مهم واستفز دماغى بجد

طبعا بجد مناقشه جميله جدا وهعلق علي كام نقطه:
المرح والود : بعد فتره هتكتشفي ان الود والبشاشه ماتنفعش في كل وقت
انتي هتتعاملي مع كل الناس وكل الطبقات
فيهم عقليات كتير بيعتبروا البشاشه من الطيبه والطيبه من الضعف
ماقلتش تكشري علي طول
بس فيه وقت بنخفي فيه قناع الود ورا قناع من الصرامه
الدعم : دايما كل مجموعه بيبقي فيها قائد بيوجه المجموعه وبيوظف قدراتها صح
وفي الغالب القائد ده نفسه بيتحرك من ورا بارافان ومابيظهرش كقائد
الابداع بقي: الابداع اولا واخيرا هو نشاط ذهني
يعني انك تخلي عقلك دايما في حاله انتباه
زي ماقلتي للتغيرات والاحداث والشخصيات
وده بيحتاج خلفيه ثقافيه واسعه
كقاعده ممكن تبني عليها ابداعك
طبعا زيها زي اي مهاره فيها موهبه في الاول وبتنمو بالمران
اختيار الابداع المناسب في الوقت المناسب بقي دي مهاره معرفش بتيجي منين:)
اه الاهلي ماتفكرنيييييييش
الماتش كان في ايدنا بس الدلع
منوراني

5- وينكي وفاصل اعلاني :
ممكن أستغل المساحه دى واعمل اعلان صغير
16 نوفمبريا جماعه..مستنياكو يوم الجمعه الجايه الساعه 8 م..قاعة الحمكمة بساقية الصاوى
هانتقابل ونحضر حفلة لفرقة أيامنا الحلوه..واحده من اكبر التجمعات البلوجرية المهمه
تعالوا وقولوا للحبايب

6- شق القمر:
من هنا انتقل للنقطة الاساسية فى الموضوع
اولا اشكرك جزيلا د.محمد
لو حضرتك استغليت المعلومات دى فى الهيئة لاى عمل هتنجح فيه باذن الله
ثانيا انا لا أؤمن بالحظ.. فكلها أقدار كما ذكرت فى ردى لفوكيرة
******************************
أؤكد ان الله عز وجل سبحانه خلقنا وارزاقنا بالتساوى
ولكن الاختلاف فى نوع الرزق
ولذلك ارى ان كل الصفات التى منحها المولى لنا والتى تذكرها د.محمد ماهى الا مسببات للرزق
وان اردت ان يعلو رزقك فى هذا الجانب فعليك بهذه المسببات
ربما نرتمى عليها اكثر لانها اقرب الى اعيننا وارجأ لراحة قلوبنا من الرزق الذى نعتاده او لا نلحظه
لذلك
كان خالد بن الوليد ذكيا فطنا يعلم متى واين وكيف ...... لذلك كانت مكانته فى الحروب والاستشارة كبيرة رغم قلة الوقت بعد اسلامه
على النقيض كان بعض الصحابة لهم من الرؤية والنفس ان ينظروا الامور بشكل اخر ويقودوا صفات انفسهم لجانب اخر .. لذلك منهم من لم يكن ليجيد القيادة لكن كان ليجود بخير العلم فى عقول الناس وقلوبهم
وهكذا تدور الحياة وتحمل لنا الأمثلة
الاهم ان تكتشف جيدا ما بداخلك
ان تضع مبادىء قويمة لنفسك لا تضر بك ولا بمجتمعك
وان تنظر العالم من حولك وترى سلبياته وايجابياته
لتبدا اول خطوة فى تحقيق الذات
وهى قيادة مبادئك طبقا لما قلت وان تؤكد عليها وتتمسك بها مهما عورضت
الاهم ان تكون انت بكل حسن
وان تكون افضل والافضل لكل الناس

هركز علي نقطتين:
1- لا يوجد انسان بلا موهبه
الفارق فعلا ان تكتشف موهبتك لتنميها او تتركها لينهال عليها التراب
(خالد بن الوليد كان عبقريه حربيه تتعدي جميع من ذكرهم التاريخ بالفعل)
2- من يتحرك بدون مبدأ كمن يتحرك بلا قاعده
سيتحرك كثيرا ويجتهد كثيرا ولكن بلا هدف
فيدور في دوائر حول نقطه بدايته دون ان يصل لشيء
الامتحانات لسه السبت اللي بعد الجاي وهنخلص في يناير
دعواااتك

شكراااا لكل اللي علق

Posted by حصان بري at 23:18 13 علقوا

Destiny

مشهد 1-أ
يخطو بحطوات مرهقه الي داخل منزله
يسقط الحقيبه علي المائده ويسقط معها علي مقعد الصالون المواجه للشرفه ,
يعود برأسه الي الخلف ليسترخي , يغمض عيناه للحظات , كان يوما طويلا
يفتحهما ناظرا الي السماء عبر الشرفه
احدي ليالي الربيع الاخيره , يحاول ان يضفي عليها نسمه معتدله للتلاقي مع سماء الصيف الصافيه.
قام من مقعده متجها الي الشرفه.
ياخذ نفسا عميقا وهو يمد يديه علي اتساعهما, تلامس يده اليمني ملمسا ناعما .
فيستدير ليجد تلك النبته التي استاجرها مع الشقه وقد ظهرت بين اوراقها زهره صغيره ورديه اللون
, لم يهتم ابدا بتلك النبته وانها لمعجزه كونها علي قيد الحياه عوضا عن كونها تزهر.
يقترب بانامله منها ثانيه ليتلمسها برفق وعينه تنظر اليها وذهنه يذهب الي الا مكان .
ترتسم علي شفتيه نصف ابتسامه وهو يسترد يده ويعود الي عقبيه الي داخل المنزل
تذكر تليفونا هاما مع المستشفي لمتابعه احد المرضي
رفع السماعه وطلب الرقم ليمسك بيده الاخري ريموت التلفاز ليضيئه
اضاءت شاشته عن فيلم
Sleepless in Seattle
فيلم قديم ولكنه من مفضلاته
يشعر بالوحده هذه الايام
رغم كل العمل والعائله والاصدقاء
الو
افاق علي صوت موظف استقبال المشفي علي الجانب الاخر من الهاتف
اطمئن علي مرضاه واوصي ممرضته ببعض التوجيهات
سيحتاج منه ان يكون في المشفي في السابعه والنصف صباحا
اغلق الهاتف والقي نظره علي الفيلم الذي قارب علي النهايه
ثم اغلق التلفاز وقام متكاسلا الي غرفه نومه

مشهد 1-ب
تعقص شعرها خلف راسها وهي تقوم عن مكتبها , يكفي هذا القدر من الاستذكار لليوم :قالت لنفسها.
نظرت الي الساعه التي تعدت منتصف الليل بقليل
خرجت الي الصاله
لا احد , يبدو ان الجميع قد نام
تذكرت انها اختلفت مع صديقتها اليوم كعادتهما في تلك الايام الماضيه
لقد صارت عصبيه بشده , وهي ايضا
حسنا , سحبت سلك الهاتف الي الشرفه لتحدثها
لم يتعاتبا كالعاده ايضا , ولكن اتفقا ان تمر علي صديقتها قبل الكليه ليذهبا سويا
اغلقت السماعه لتنظر الي السماء وهي تبتسم:
دائما ما يختلفن بشده في الصباح لتتصل احداهن في المساء كأن شيئا لم يكن
نعم هي عصبيه بشده ولكنها طيبه القلب , وصديقتها منذ الطفوله
تناهي الي اذنها صوت موسيقي مألوفه
يبدو ان جارتها تشاهد التلفاز
لم لا؟
تركت الشرفه لتضئ التلفاز
تنقلت قليلا بين القنوات ثم
Sleepless in Seattle
الان تذكرت لماذا تبدو تلك الموسيقي مألوفه
انها تعشق هذا الفيلم
احضرت هاتفها المحمول بجانبها ليوقظها في السادسه حتي يكون امامها وقت للعبور علي صديقتها
وافترشت الارض امام التلفاز بالطريقه التي تعشق بها مشاهده الافلام
واسندت راسها علي يديها
مشهد 2-أ
السادسه والنصف صباحا

-المصري اليوم ياعم ابراهيم
-اتفضل يا دكتر علي
فرد الجريده امامه ليعبر ببصره علي عنواينها الهامه ثم لم يلبث ان ادخلها حقيبته
لم ينم جيدا ولكنه مع هذا استيقظ من تلقاء نفسه
يشعر بنشاط وانطلاق اليوم
لا يدري مصدر اي منهما
سيسير قليلا في الشارع الرئيسي قبل ان يأخذ الاوتوبيس الي المستشفي
يسير قليلا
ثم يشرد في مريض الأمس للحظات
حتي يكاد يصطدم بفتاه تخرج لتوها من شارعها
تتلاقي عيناهما
انه يعرف تلك الفتاه
تنظر له للحظه ثم تطرق الي الارض
ينتبه لنفسه
اسف يا انسه
ويتعداها ليكمل طريقه
حسنا لقد رأها من قبل في اي مكان ولكنه لا يتذكر
هذا كل ما في الامر
لم يشغل عقله؟
يكمل السير قليلا ثم يجد الاوتوبيس خلفه فيوقفه ثم يركب

مشهد 2-ب
السادسه واربعون دقيقه
نعم تلك البنايه
الدور الثالث
تفتح باب الشقه وهي تودع والدتها
تنزل سلالم البنايه قفزا وهي تطلب رقم صديقتها كي تنتظرها اسفل بيتها
-خلاص خلاص كويس برضه علشان منتاخرش
اقابلك في الكليه
هكذا اغلقت الخط

-صباح الفل يا عم محمد
-ياصباح الياسمين انسه مريم

نعم انه صباح الياسمين
قالت لنفسها
تشعر اليوم بنشاط وانطلاق لا تدري مصدرهما
خرجت الي ناصيه شارعها وهي تحث الخطي فيما يقارب الجري
حتي انها كادت تصطدم بشاب
تتلاقي عيناهما للحظه
انها تعرفه
ثم تنتبه لنفسها فتخفض عيناها الي الارض
حسنا لقد رأيتيه من قبل في مكان ما ولكنك لا تذكري , ماذا في هذا؟
لم تشغلي عقلك؟

هكذا فكرت ثم ادارت وجهها لتنتظر الاوتوبيس

مشهد 3
يصعد الي الاوتوبيس
لا يوجد مقعد شاغر
حسنا لقد استيقظ الجميع مبكرا اليوم
لحظه هناك مقعد ليس عليه سوي حقيبه
وبجانبه فتاه تضع سماعه في اذنها وتعطي وجهها للنافذه
يقترب حتي يجلس....
انها هي
تلك التي اوشك علي الاصطدام بها
لم يدري لم تذكر تلك الورده التي وجدها في شرفته البارحه
نظر الي جانب وجهها للحظه ثم ابتسم وهو يقول :
-تسمحي اقعد

كانت تستمع الي صوت فيروز ثم تسمع صوتا يطلب الجلوس فاستدارت لتري ابتسامه ساحره
انه هو
ارتبكت قليلا ثم رفعت حقيبتها من الكرسي المجاور
جلس ثم اخرج الجريده من حقيبته
ووضعت السماعه مره اخري في اذنها

كان كلاهما يفكر
كانت عيناه علي السطور , وعقله يفكر :بها شئ لا يدري ماهو؟
كانت الكلمات تعبر اذنها , وعقلها يفكر :به شئ لا تدري ماهو؟

لم يركز فيما يقرأ فطوي الجريده ووضعها امامه وامال راسه للخلف وهو يتمتم:
When marimba rhythms start to play
Dance with me, make me sway
Like a lazy ocean hugs the shore
Hold me close, sway me more

كانت تستمع الي
sway
عندما سمعت من يتمتم:
Other dancers may be on the floor
Dear, but my eyes will see only you
Only you have the magic technique
When we sway I go weak

استدارت فوجدته ينظر اليها

Posted by حصان بري at 14:50 9 علقوا

مود ما بعد محاضره الباطنه الاخيره

ناموسه وقعت في كاس ويسكي
طلعت تقول وسع النسر

مع الاعتذار للخشاب

Posted by حصان بري at 14:07 7 علقوا

الفتح الاسلامي..... فتح ام غزو؟

قال الشاعر الإنكليزي " سوذي " يصف جيوش المسلمين التي غزت أوروبا بعد فتح الأندلس: :-

جُمُوعٌ لا تُحْصَى ...
من عرب ، وبربر ، وروم خوارج ....
وفُرْس ، وقبط ، وتتر ، قد انضووا جميعاً تحت لواء واحد ...
يجمعهم إيمان ثائر ، راسخ الفُتُوُّة ....

Posted by حصان بري at 21:59 4 علقوا

الاتترنت : عالم موازي

من اهم خصائص الانترنت

الكلام لافف شويه
نبسط الصوره:)

الانترنت هو عالم بلا رقيب
بلا حدود
اذا اعتبرناه اعظم اختراعات البشر حتي الان فلن نبتعد كثيرا عن الحقيقه
لقد احتجز لنا الكره الارضيه بداخل غرفه صغيره
تستطيع من خلاله ان تجول العالم كله وانت تحتسي قهوتك الصباحيه
اصبح كالاخطبوط يساعد في كل مجال واي مجال
قفز بالبشريه مائه عام علي الاقل الي الامام

ولكن ليس هذا مقال عن مميزاته
بل عن اثره السلبي علي شباب العالم عامه وشباب العرب بوجه خاص كما يلي:

انتشرت في الثلاثه سنوات الاخيره المنتديات والمدونات بشكل كبير بين الشباب العربي
وهذا ان كان في احد جوانبه مؤشر جيد لدخول عصر التكنولوجيا

الا انه علي الجانب الاخر اصبح كبوابه عبور
يتحول شبابنا عبرها تدريجيا من عالم معقد له اسس وقواعد يصعب فيه النجاح وهو حياتهم العمليه
الي عالم لا يحتاج النجاح فيه اكثر من بعض الوقت وعده ضغطات علي لوحه المفاتيح وهو عالم المنتديات والمدونات

من عالم تواجههم فيه الضغوط والعقبات
الي عالم اقصي عقباته هو انقطاع التيار الكهربائي

فصار الشاب يقضي جل وقته فرحا بذلك النجاح الخالي من المجهود

يهرب من فشل حياته اليه
بل ويهرب من اي صعوبه يواجهها خلال حياته اليه
اصبح كعالم الاحلام بالنسبه له

وبما انه قد فشل في حياته العمليه
فستجد ثقته بنفسه في اقصي درجات انحدارها
فيحاول تعويضها بوقت اكثر في ذلك العالم المواز
كي يجني نجاحا سهلا فيه ويهرب من مواجهه فشله في الحياه

فيدمن ذلك العالم شيئا فشيئا
ويصير عالمه الاصلي بالنسبه له كانه كابوس يتمني ان يستيقظ منه سريعا ليعدو الي عالمه الجميل
وفشل يتبعه فشل في حياته
يربطه اكثر بعالمه المواز
ويدور في دائره مغلقه تنتهي بانسان فاشل كليا

هذه ليست قاعده بالتاكيد
فالكثير من نشطاء الانترنت والمدونين قد نجحوا وبقوه في حياتهم العمليه
ولكن اذا بحثت ستجد الكثيرين منهم ايضا يهربون من فشل في الحياه العمليه

هو مؤشر تواجد بقوه فلا ينبغي تجاهله

لا ينبغي ان نتجاهل شابا تجده قد امتلأ حيويه ونشاطا بين مستخدمي الانترنت بينما يجلس كئيبا حزينا وحيدا في غرفته يندب فشله

لا ينبغي ان نتجاهل فتاه كالفراشه علي صفحات الانترنت تصطنع السعاده بينما ادمي الدمع مقلتيها علي حبيب غادر او تجربه فاشله

لست ادري لمن اكتب هذه الكلمات
ولا ما الحل لتلك الظاهره
ولكني وجدت هذه الظاهره وبقوه

فتحدثت عنها
عسي ان يكون صاحبها احد من يقرأ
او صديق له
فينصحه بمواجهه حياته لا بالهرب منها

Posted by حصان بري at 04:32 28 علقوا

الحياه هي

ان تكون واثقا انك تعمل ما تحب
فقط ما تحب

التعليقات
1-wild bird:
بتقول:
احيانا نعمل ما لانحب
فقط لندرك قيمة مانحب

لم نختلف فتلك فتره لا تحسب من العمر
تلك التي لا تعملي فيها ما تحبيه
قصدت بالكلمه الا نضيع العمر في شيء لا نحبه بل ونعشقه
منوراني يا هوبه

2-sahr
احساس جميل ان نعمل ما نحب بنلاقي فيه نفسنا وبيكون فرصه للابداع والانجاز
ولو عملنا ما لا نحب بتعدي برده بس مش بنفس احساسنا لو عملنا ما نحب

فعلا لما بتعملي حاجه مابتحبيهاش بتحسي ان عمرك بيتسرق وطبعا مفيش فرصه للابداع وبيكون العمل عليكي هم ثقيل
انما لو بتحبي شغلكبيكون كانه هوايه بتمارسيها وانتي كلك حب ليها

3-wildbird
اولا انا ماكنتش اعرف ان موضوع الردود هيبقى ماشى بالطريقة دى فى كل البوستات:)
على العموم انا كنت اقصد
ان بالضد تظهر الاشياء
لو ماجاش عليك الوقت اللى تعمل فيه حاجة مش بتحبها
مش هتعرف قيمة العمل اللى بتحبه
بس هى مرحلة فعلا زى ماانت قول

واللهي ولا انا كنت اعرف
هي جت كده:)
بدل ماارد جوه ارد بره واهو نعرض راي الشباب
عموما هي غالبا مش هتبقي لكل البوستات
هو فعلا بتضادها تظهر الاشياء
بس يعني مش هنعيش في حزن ونقول علشان نحس بطعم الفرح
انا بس فعلا لقيت كتير بيشتغل او بيدرس حاجه مبيحبهاش ولا عمره هيحبها
وده انتحار رسمي
ساعات الظروف بتبقي اقوي بس ربنا ادالنا عقل نتحكم بيه في حياتنا
منوراني ايها الطائر البري:)


son's egypt:
شكله مصمم علي الاسم هعمل ايه انا يعني:)
السلام عليكم
جميل ان الانسان يعمل ما يحب شرط ان لا يكون هذا يضطر بشخصة ام بمن حوله من الناس

بيتكلم عن حريه الانسان الشخصيه مش عمله
طبعا الحريه اسمها صحيح حريه لكنها لها شروط وتقاليد يضعها المرء قبل ان يضعها المجتمع

مش فاهم حاجه:
حب ما تعمل
لتعمل ماتحب

هي تقريبا حتي تعمل ماتحب
ساعات فعلا الظروف بتبقي اقوي
بس انا بعتبر المثل ده من امثال كتيره عربيه بتدعو فقط للرضاء بالنصيب
:)زي اللي يبص لفوق يتعب مثلا
منورني ياباشا


lolo:
يابنتي امضي بمدونتك خلينا نعرفك
انا مش ها اعلق على الكلا م لان احنا او معظمنا مش بنتعلم الى بنحبه ف صعب نبنى اى حاجة علية وكمان الحياه بتحط قدامنا اختيارات ممكن ما نحبهاش الموضوع بجد معقد جدا
بس اكتر حاجة عاجبانى الصورة جميلة ومعبرة بس

ليه بس التشاؤم ده يا كابتن
حكايه مش بنتعلم اللي بنحبه دي
كتير قوي بيتخرجوا وبعدين بيعيدوا ثانوي تاني علشان يختاروا الكليه اللي بيحبوها
طبعا ضياع كبير للوقت بس في الاخر بيكون حاسس انه عايش
مش دفن نفسه بنفسه
اما حكايه الظروف فدي موجوده بس مش المفروض تبقي شماعه لكسل واحد فينا
يعني زي مافيه ظروف فيه اراده انسان
بالنسبه للصوره فهي فعلا تحفه
:)بيني وبينك هي جت الاول وبعدين البوست
منوراني يا mrs x

Posted by حصان بري at 00:40 11 علقوا

تضحيات بلا قيمه

Posted by حصان بري at 18:03 14 علقوا