Tuesday, 14 August 2007

عيد ميلادي يا بشر

مبدئيا البوست ده هيطول بس اعتقد هيكون خفيف

الكام بوست اللي فاتوا حسيت اني قلبت فيلسوف و الكلام كان تقيل حبتين انا عارف
المره دي البوست مختلف
بالضبط هكمل 23 سنه بعد بكره
الخميس ان شاء الله 16/8
وكان ميلادي يوم خميس برضه
-طبعا هديتي محفوظه :)
بس مش هتكلم عن كده

كل واحد بيشوف عيد ميلاده بمنظور مختلف
فيه اللي بيفرح بيه وفيه اللي بيتحسر علي السنين اللي فاتت من عمره

بالنسبه لي
قعدت احسب ايه المميزات والعيوب اللي كانت في السنه اللي فاتت؟
ايه الاخطاء اللي وقعت فيها؟
علي حسب مافتكرت يعني
سواء علي المستوي الديني او الاجتماعي او العلمي او العاطفي حتي
اكتشفت كوارث
يمكن اقول حتي اكتشفت شهور كامله ضاعت من غير ماستفيد منها حاجه جامده
عدت وخلاص
ده غير الاخطاء المتراكمه اللي يمكن ساعات ماكنتش بتعلم منها وبعيدها تاني ويمكن تالت
وعلشان كده نويت قبل مادخل السنه الجديده احط الاخطاء في ورقه
ولو كانت تافهه
وامسك واحده بواحده اصلحها
وفي الغالب هتلاقوها اخطاء في الشغل او اجتماعيه ودينيه والثلاثه قابلين للاصلاح اوالتوبه
................................................
وانتوا
كل واحد يقعد مع نفسه يحاسبها علي سنه عدت
شايفين الجنينه اللي فوق دي
اكيد كل واحد عنده جنينه زيها قريبه من بيته
ممكن مش زيها قوي يعني :)
المهم يقعد فيها
ايون علي الارض

ولو في المصيف يبقي يا سلام يطلع علي الشط من المغرب للعشا
ويقعد علي الرمل

لو لا كده ولا كده يطلع في البلكونه ويجيب سجاده صغيره - سجاده الصلاه مثلا - وينام عليها ويبص في السما
المهم اي حاجه تساعد علي التركيز

يشوف السنه اللي فاتت
استفاد فيها ايه وغلط فيها ايه؟
ويمسك الاخطاء واحد واحد ويحاول يصلحها
فيه اخطاء ممكن يلاقيها صعبه جدا وكبيره ومعاه طول حياته وحاول يصلحها قبل كده وفشل

ياجماعه الانسان بيستخدم اقل من 10 في الميه من طاقاته
وانا بقول ان الانسان المصري بيستخدم اقل من 1 في الميه
ركز بس وحاول تاني

لو مثلا في الشغل
حاسس انك مش في المكان اللي تتمناه
اوعي تفكر ان ده مكانك خلاص
ركز وغير طريقه شغلك
ابدع حاجه جديده
طريقه جديده
فكر في حاجه تديلك مكسب اكتر او شهره اكتر
ركز مره واحده وصدقني هتحافظ بعد كده علي الدرجه اللي وصلتها بسهوله

امسك حياتك من الالف للياء
لو بتكتب وحاسس ان اللي بتكتبه مش بيأثر في اللي بيقراه
ركز في موضوع وطلع فيه كل طاقاتك بحيث يكون اهم موضوع هتكتبه
اهم قصه
اهم روايه
حط فيه كل اللي عندك
وهتلاقي اللي بعده علي نفس المستوي او اقل بجزء بسيط

يااخي لو بتلعب اي لعبه -ولتكن شطرنج -مع واحد ومبهدلك
وانت عارف انه بيلعب احسن
ركز مره وامسح بيه الارض
هتفرق معاك كتير

لو كان عندك هوايه وحاسس انك ممكن تبقي فيها حاجه ارجعلها

علي المستوي الديني بقي
ايه رأيك لو تنوي يوم من الفجر انك مش هتعمل فيه اي معصيه
ايوه يوم واحد من غير معصيه - كتير ؟
وطبعا المعاصي هنا تشمل الكذب والنميمه والسباب والنظر والتصنت والسجاير لو بتشرب والمكياج لو بتحطي
وطبعا هتصلي كل الصلوات ويا حبذا لو تكون جماعه
ولو تعمل حاجه من اللي جاي ده يبقي كتير خيرك
صله رحم او زياره مريض او الذهاب في جنازه
وشوف بعدها هيأثر فيك ازاي!!!

هتواجه صعوبات؟
اكيد وده اللي هيخليك اقوي

ياجماعه احنا عايشين مره واحده
لو ماعشناش صح يبقي ملهاش لازمه
مفيش اي داعي اننا نخزن طاقه جوانا مانستفادش بيها
طلعها مره هتلاقيها بتسبقك للخروج
احجز لنفسك مكان تحت الشمس زي مابيقولوا

:) اه بالنسبه للهديه انا عاوز مع كل تعليق نكته
بس تكون حلوه
بلاش نكت بايخه في عيد ميلادي ياريت :)

و كل سنه وانتم كلكم طيبيييييييييييييييييين
تحديث
هديه من رنا وشكرا عليها بجد رقيقه جدا

36 comments:

شيماء الجيزى said...

احم احم

بما انى اول تعليق فاعذرنى مش هقدر اكتب نكته
اصل انا عارفه نفسى بايخه

بس كل سنة وانت بالف خير وطيب وفى احسن حال
وتكون احسن دكتور فى الدنيا يا رب


ومتنساش تفوت عليا
انا بعدك ب4 ايام

يعنى هدية متبادلة
:d

كلامك جميل يا محمد
واتمنى اعمل بيه
ولونى عارفه نفسى

هههههه

سلام يا صاحبى

Hadota .. حدوتة said...

السلام عليكم
ازيك يا دكترة
كل سنة وانت طيب
يعنى فين بقى الجاتوه والحاجة الساقعة

اجى وامشى كده من غير كوباية مية؟؟ والاسم انى لابسة هدوم العيد وجيبة معايا هدية وجية عيد ميلاد

هستنى منابى المرة الجاية

بس مجازا هنعتبر فيه تورتة ونديها اغنية مهداة من صديقة البرنامج حدوتة


هابةى بيزداى تو يو
سنة حلوة يا جميل



بالنسبة للنصايح اللى فى البوست حلوة
احلى ما فيها انك بتقول للناس ركزوا وعيدوا الحسابات ودا عجبنى بدل ما تقلهم اللى مش فالح فى حاجة يغيرها لان دا قمة الفشل والاستسلام


النكتة .. معلش قررت اقول نكتة بايخة

مرة طفل شاف ممته حامل سالها ايه اللى فى بطنك دا ياماما؟؟؟
قالتله اخوك يا حبيبى
راح المدرسة المدرس ساله : انت عندك اخوات يا حبيبى ؟؟
رد الطفل : كان عندى بس ماما كلته
:D

تحياتى ليك يا دكتور

فوكيره said...

شكل صوابعى حتبدأ تتفك عقدتها

هنا

--

كل سنه وانت طيب
و انت بتفكر صح
بتستغل دماغك صح
بتستغل قدراتك صح
وبتحاسب نفسك صح

السنه الى فاتت كانت اكتر حاجه فكرت فيها ايه الى اتعلمته منها
وخصوصا من الناس الى حوليا

تصور البحر جنب بيتنا ... ونفسي اروح يوم اعمل الى بتقول عليه ده
من مده

ولسه مش عارفه انفذ

يـــــا مسهل

انا مش حكتب نكته علشان معنديش المهاره دى

لكن حكتب حكمه انا مؤمنه بيها جداا

" start with ur self "

يااه لو كلنا نعمل كده ... حتفرق كتير

تحياتى
جدا اوى خاالص

hamada said...

طل سنه وانت طيب وسنينك الى جيه مليانه تفاؤل وحب والتزام وقرب من الله

حصان بري said...

شيماء:
كتبتي التعليق ده امتي؟
طبعا مبسوط انك اول تعليق
:) ولو انك بايخه فعلا انك ماحطتيش نكته

وانت طيب يا صاحبي والسنه الجايه تبقي صحفيه مشهوره بس ابقي افتكرينا بس

:) ايه المعامله دي؟
احنا فينا من كده :) هديه متبادله؟
انا قلت هي معرفه مصلحه من الاول

ياشيماء انتي بس لو تروقي وتنظمي وقتك هتبقي احلي دماغ
ومن ناحيه الاراده فانتي بسم الله ماشاء الله بتحاربي باقتناع بموهبتك

سلام يا جميل وكل سنه وانتي طيبه

حصان بري said...

حدوته:
الانسه ..... :) وش بيطلع لسانه
ايه ده هديه؟
بجد؟
هي فين ؟:)
ياباشا انت تؤمر
حالا اجيب دسته جاتوه وكام حاجه ساقعه
بس اشوف الهديه
سلم واستلم :)

سنه حلوه عليكي يا جميل

يابنتي الانسان جواه طاقات بجد ميقدرش يتخيلها بس هو يحاول يطلعها

ههههههه نكته حلوه زيك ومنوراني بجد يا حدوته

حصان بري said...

فوكيره:
كل سنه وانتي طيبه
وانتي باحلي احساس
وانتي باطيب قلب
وانتي باجمل عقل

يابنتي انا من موقعي هذا - كرسي المكتب
بحقد علي كل من يسكن بالقرب من اي بحر ولو كان بحر رمال
بجد القعده علي البحر بالدنيا

حلوه قوي الكلمه
وفعلا ساعات بننصح وننسي نفسنا
بنفيد الناس وننسي نفيد نفسنا
كان فيه خطيب عندنا دايما يقول
اللهم اني اعوذ بك ان اكون جسرا يعبرون فيه الي الجنه ثم يلقي به في النار
خايف قوي من الكلمه دي

تحياتي كتير خالص مالص .... منوراني

حصان بري said...

كادرو باشا:
وانت طيب يا كبير
مش هقدر اقولك اللي تستحقه بس بجد ربنا ميحرمنيش منك يا صاحبي
وبجد اكتر من اخويا
سلامووووز يا صاحبي

Rana Degheidy said...

كل سنة وحضرتك طيب
وبصحة وعافية وعقل يزيد اربعين سنة
اتمنى ان تعليقى هنا يتسجل مش زى اللى فاتوا
:(
وباذن االله لك هدية
بس انا ملييش فى النكت
هخليها هدية من طابع احبه انا جدا
كل عام وحضرتك بالف خير مرة اخرى
ونشوفك العام القادم بقيت حلاص طبيب امتياز

ساعه الغروب said...

اولا

كل سنه وانت طيب وبالف خير يا رب

يا رب بجد السنه الى جايه تكون فعلا عملت كل اللى انت بتتمنى انك تحقه
سواءفى شخصيتك او فى عملك اوى فى اى مجال بتتمناه


ثانيا

ميرسى اوى ليك بجد انك عايز كل حد يبقى فرحان معاك ومستفيد اوى من يوم ميلادك



ثالثا

حلو اوى بجد انك فعلا تعمل كدا
انا بعمل كدا كل ينه بس بورقه وقلم وافضل اشوف الىل اكتسبته وايه اللى فقدته وعددةالاصدقاء اللى بجد وحاجات كدا كتيره اوووووى

والحمد لله بوصل لنتيجه كويسه جدا
الحمد لله


يا رب بجد تكون ايامك كلها خير وسعاده بجد بجد

شكرا ليك

:)

yasmina said...

الف الف مبروك
وعقبال المية وعشرين

عارف الانسان اللي بيوقف مع نفسه وبيحاسبها بيكون انسان مثقف وواعي
ان شاء الله تبقى احسن دايما

اقول نكتة مع اني مش كثير بعرف

اطفولي الضو!!!
واحد بخيل جاب ثلال تفاحات، فتح اول واحده لاقاها معفنه رماها، فتح تانى واحده لاقاها معفنه رماها.. قام طفى الضو واكل الثالثة...

Ert3ashat said...

كل سنه و انت طيبببببببببببببببب

sara... said...

كل سنه وانت طيب
وعقبال 100 سنه

حصان بري said...

rana:
:)وانتي طيبه وايامك كلها طيبه يا رنا
هو فيه تعليقات ليكي ماتسجلتش قبل كده؟
قولي بس وانا هبهدل المدونه

هيييييييييييييييييه هديه
فين هه فين؟
:)
كفايه انك تنوريني يا رنا بجد زيارتك بتسعدني
يارب يا رنا احسن الواحد خلاص زهق من الدراسه
تحياتي يا شق القمر

حصان بري said...

روووودي هانم:
اولا: منوراني يا جميل والهديه وصلت
وشكرا علي الدعوه الحلوه

ثانيا:
كل سنه وانتي بخير وطيبه دايما يا رضوي
والسنه الجايه الاقي معاكي احمد الكبير وفارس السغير

ثالثا:
الف شكر علي الكلام الحلو ده كله وعلي راي واحده اعرفها
ميرسي ليكي بجد :)

حصان بري said...

ياسمينا:
هههههههه مبروك عليكي وعقبالك
ثم 120 بس؟
ماسكه ايدك قوي كده ليه؟:)
منوراني يا ياسمين بجد
والنكته جميله
كل سنه وانتي بالف خير
تحياتي

حصان بري said...

ارتعاشات:
وانت طيب ياباشا
منورني

حصان بري said...

ساره:
وانتي طيبه يا فوكا
منوراني يا جميل

DARK said...

كل سنه وانت طيب زعقبال مليون سنه
وبجد البوست بيجنن
حلو أوى الأمل ده
ربنا يسعدكويملأ حياتك امل الفرح دائما

Rana Degheidy said...

السلام عليكم اعزائى
سلام عليك د.حصان برى
كنت قد وعدت باهدائك هدية
هى من مبتدئات شغلى فى عالم الفوتو
لسه شغل فى حرف الالف يعنى
:))
اتمنى تعجبك
مؤقتا حتى ادخل فى باقى الحروف بقى
http://aycu30.webshots.com/image/25349/2001251930887680453_rs.jpg

حصان بري said...

dark:
شكرا يا دارك
وانتي طيبه
ربنا يسعدك انتي كمان ويملا حياتك امل ونور
وتفتحيها علينا شويه :)
منوراني يا دارك

حصان بري said...

رنا الدغيدي:
:) طيب هقول ايه بعني
اشكرك
شكرا بجد يا رنا والصوره جميله فعلا
وهحطها فوق في البوست
جميل انك بتهوي الجرافيكس برضه
:) كده هوايه مشتركه
:) ولو اني برضه مش بعيد عن حرف الالف
تحياتي يا رنا وشكرا مره تانيه

Rana Degheidy said...

ههههههه
لا حضرتك بتشكل الالف والام فى لقبى العائلة يعنى مع انه مش فيها
:))
انا ببدا اتعلم وسعيدة انها عجبت حضرتك
ويارب اتعلم وازيد الجميع احتفالات
تكرم على اثرائك واضافتها اعلى فى البوست

gohayna said...

كل سنه وانت بالف خير وصحه وسلامه يا حج

ويارب عقبال المليون سنه

ومن هنا ورايح

وبما اني اكبر منك يبقي تقولي يا طنط

انت عارف بقي النفسنه يعني


طبعا انك تبص لعيد ميلادك من منظور مختلف


انك تحاسب نفسك
وتصحي لكل شيء

عملناه في حياتنا

وتبص فعلا لعمرك الي فات


وتحاول تستفيد من عمرك الي جاي

بعيد عن الكلام دا كله بقي
فين الجاتو والترته

والحاجه الساقعه

كنا عايزين نغنيلك
يلا حالا بالا حيوا ابو الفصاد

ونطفي الشمع

سلقتنا كدا يعني

ماشي يا حج


كل سنه وانت بالف خير وصحه وسلامه

حصان بري said...

رنا:
ههههههههههه
رنا دغيدي يعني؟
طيب بالمناسبه يعني ايه دغيدي؟ :)
ياجميل مانتحرمش من زيارتك دايما
واقل حاجه اني حطتها في البوست
اه :) اتنين حضرتك دول ماعتقدش بقي لهم محل من الاعراب
احنا بقينا اصحاب علي ماعتقد
ماشي يا دكتر؟
تحياتي وسلام

حصان بري said...

جيجي هانم:
قبل ماارد قلت اكيد نزلت الجديد ,رحت لقيت انين الصمت, صمت صارخ بالرومانسيه كالعاده وابداع جديد

كل ثانيه وانتي اسعد يا جيهان ويارب تنولي كل اللي تتمنيه

ايه العقد دي ؟ علي راي يونس شلبي : كلها كام شهر واحصلك وابقي اكبر منك كمان

:) وبقيت ابو الفصاد
ايه الكلام ده هو الجاتوه خلص
يبقي انتي جيتي متاخره بقي :)
مع اني قلتلهم يسيبوا لجيجي نص التورته
خووووونه :) قلبي قلبي
هههههههههههههه
منوراني يا دكتر بجد
سلام

WiLdBiRd said...

كل سنة وانت طيب

متاخرة انا عارفة
:)

اما عن الهدية فماينفعش

مود الباطنة مازال لايسمح بنكت
والا هتبقى نكت دمها تقيل

ولسه بتقول قلبتها فلسفة البوستات اللى فاتت

امال ده اية

وبعدين كل شوية حد يقول اقعدى مع نفسك اقعدى مع نفسك

انا دلوقتى زهقانة من القاعدة مع نفسى

عاوزة اقعد مع حد تانى

بس نفسى ماتبقاش معانا خالص الله يخليك

بندقه said...

ياه انا اتاخرت اوى
بس بجد غصب عنى ما تزعلش اعوضهالك السنه اللى جايه
كل سنه وانت طيب
وعقبال مليون سنه

انا لسه ماقريتش البوست بتاعك هقراه واجى تانى

بندقه said...

السلام عليكم
حلو اوى انك تكون عملت كده واستفدت من اخطائك اللى فاتت
بس يارتنى اعرف اعمل كده
انا مابعرفش خاص افكر فى الفات
انا لما بيجى عيد ميلادى كل اللى بفكر فيه اقولهم يجيبولى ايه فى عيد ميلادى

اه النكته... تنفع دى

مره وحكم كوره قعد على قهوه طلب واحد صفر

مره طفل بيحب المدرسه بتاعته اوى قالها تتجوزينى....قالتله انا مابحبش العيال الصغيره.....قالها انا مش مستعجل

حصان بري said...

ههههههههههههه
وكالعاده الاطباء اخر من يصل الي موقع الاحداث
:) هي عادتنا ولا هنشتريها

wild blue bird:
:) فعلا لقيته قلب فلسفه برضه
بس حاولت اتكلم بلغه بسيطه مش اكتر
اعتقد البوست الجديد مختلف شويه

هههههههههههههه
يابنتي هو فيه حد بيكلم نفسه في الشارع غيرنا؟
عندك حق الواحد حاسس انه هيخلل من قعده البيت
بس مرغم اخاك لا بطل
شدي حيلك وربنا معانا ومع اي واحد اضطر يقعد قدام كتاب باطنه في يوم
تحياتي وكل ثانيه وانتي طيبه يا هبه
وشكرا ليكي

بندقه:
وعليكم السلام ورحمه الله وبركاته
:)طيب انتي في اخر الصف بتحجزي ليه يعني؟
بجد شكرا ليكي
وانتي طيبه يا بندق
طبعا الهديه اولا ثم التفكير في الماضي:)

بس بجد حسيت عيد ميلادي السنه دي باحساس جديد وحبيت ابدأ معاه بدايه جديده
انزل ويندوز جديد يعني
وتبقي ايه فايده التجارب لو ماتعلمناش منها

هههههههههههههه
التانيه حلوه بجد
شكرا ليكي يا جميل

Mony The Angel said...

ana geeeet met2a5ar :$$$$$

sorry bgad :$$$$$$

kol sana wenta tayeb (^)(^)(^)

w about al a3da m3a alnafs de b2a
falamma yeb2a yeegy 3eed melaady isA lol

matez3alsh 3shan geet met2a5ar

to come late better than to never come ;)

~ Bato0ot ~ said...

happy birthdaaaaaaaaaaaaaaaay
ana mt2khra awy im so sorryyyyyyy
kol sana wenta a7san ya rab

ريـــانه said...

ايه الاحراج ده جيه متأخره و كمان مفيش هدية

معلش بقا أختك مش شاطره في النكت أبدا


عموما كل سنه و انت طيب و يارب السنه دي تبقى أحسن من الي فاتت وتقدر تعمل بالكلام و التحليل الجميل الي ختمت بيه السنه دي

وأتمنالك عمر طويل فصحة وسعادة

ان شاء الله

تحيتي لك

حصان بري said...

moony:
to come late better than to never come ;)
:)لا فكره برضه
منوراني طبعا يا منه
وانتي طيبه يا جميل

هههههههههه
عيد ميلادك امتي طيب؟
هي مش فاضيه حاليا؟

تحياتي يا مووون ونورتيني بجد

حصان بري said...

batooot:
ايوه يا سيدي .... القعده في مارينا بقي بلا مدونات بلا وجع دماغ :) اوعدنا يارب :)
حمد الله علي السلامه يا انووووج
وكل ثانيه وانت طيب يا بطوط
نورتيني

حصان بري said...

ريانه:
لا طبعا مش مهم النكته
لو الفين جنيه علي باب المدونه وخلاص مش هزعل:)
اصلا مش عارف ليه اغلب المدونين بيتكسفوا يقولوا نكت
كفايه انك نورتيني يا ريانه

يارب بجد يا ريانه لو ربنا قدرني علي جزء من الحاجات اللي فكرت فيها هتبقي حاجه كويسه جدا

يارب كل ثانيه في عمرك احلي من اللي قبلها يا ريانه
تحياتي